DAGSTUKKIES UIT DIE BYBEL:
GENIET DIE LEWENSREIS

Kom en geniet saam met ons die Dagstukkies uit die Bybel vandag, Suid Afrika. Die Goeie Nuus  Bybel vers vir vandag en Bybelstudie kom uit  die Rhapsody van Realiteite van Pastoor Chris Oyakhilome, die wêreld se #1 Dagstukkie:

“Die dief kom vir niks anders nie as om te steel, dood te maak en te vernietig. Ék het gekom sodat hulle lewe kan hê, ja, sodat hulle dit oorvloedig het” (Johannes 10:10).

Ek was nog altyd lief daarvoor om by die venster te sit op ’n vliegtuig. ’n Venstersitplek gee jou ’n wonderlike uitsig; dit bied ’n unieke geleentheid om geïnspireer te word deur die dinge wat jy op daardie hoë hoogte kan sien: die ysige uitspansel van Arktika, die glinsterende pieke van die Alpe, die Andes, die wolke, ensovoorts. Elke nou en dan, wanneer ek uitkyk en die skoonheid en wonder van God se skepping geniet, sê ek: “Geseënde Vader, U is wonderlik! Daar is soveel skoonheid!”

Voordat ek dus by my bestemming aankom, geniet ek die reis. Die lewe is ook so, ’n reis om te geniet. Tussen nou en wanneer die Meester terugkom, is daar baie om te geniet, daarom hoef niemand ’n gefrustreerde lewe te lei nie. As jy sou leer om aandag te gee aan al die mooi dinge en mense om jou en dit geniet, sal jy elke dag gelukkig lewe.

Dit is ’n wyse keuse as jy besluit om jou lewe en jouself te geniet, selfs in eenvoudige goedjies. Sommige mense geniet nie eens hulle maaltye nie; hulle jaag dit altyd vies af. Ander word kwaad wakker; selfs as hulle na hul werk, besigheid, of skool ry, of pendel, is hulle kwaad, ongelukkig en gefrustreerd. Hulle ignoreer al die liefde en skoonheid om hulle.

Lees weer ons temavers: Jesus het gekom dat ons die lewe kan hê en dit ook kan geniet! Om jou lewe te geniet gaan nie net oor deelneem aan TV-programme, komedies kyk, of ’n avontuur nie. Inteendeel, dit beteken om elke oomblik van jou lewensreis te geniet, geniet alles wat jy doen, solank dit ooreenstem met ’n goddelike lewe, want jy is ’n kind van God en jy weet dat God sy droom deur jou vervul.

God het jou ’n lewe van vreugde gegee, maar dit is jou verantwoordelikheid om dit uit te druk. Laat die vreugde van die Here sigbaar wees in jou lewe, met soveel glans dat jy die vrede van God ten volle openbaar. Neem ’n doelbewuste besluit om elke oomblik van jou lewe te geniet.

BELYDENIS

Die Here het my alles ryklik gegee om te geniet. Hy het my gebring in ’n lewe van rus, vol van vreugde en heerlikheid. Niks is te goed vir my nie. Ek is vandag vol vreugde en lei ’n groot lewe van geregtigheid, gesondheid, rykdom, voorspoed en sukses in Christus. Eer aan God!

VERDERE STUDIE:

1 Timótheüs 6:17; Jesaja 12:3; Spreuke 17:22