DAGSTUKKIES UIT DIE BYBEL:
NEEM JOU PLEK AS KONING PRIESTER IN

Van geweld sal in jou land nie meer gehoor word nie — van geen verwoesting of verbreking in jou grondgebied nie; maar jy sal jou mure Heil noem en jou poorte Lof (Jesaja 60:18).

Die vlaag van boosheid, goddeloosheid en misleiding wat vandag deur die Satan en sy trawante in die wêreld aangehits word, is iets waardeur slegs die Kerk van Christus Jesus kan sny. In die hedendaagse wêreld is ons die weerstandbiedende mag teen die kwaad. Ons het vandag die gesag in Jesus se Naam om sataniese aktiwiteite te verhinder. Deur gebed kan ons God se geregtigheid vestig op plekke wat deur die agente van die duister en duiwelse owerhede oorheers word. Moenie sit en niksdoen nie; neem jou plek in as koning-priester wat saam met die Here sy wil laat geskiet op aarde.

Lees die Psalmis se inspirerende woorde oor jou roeping; die eer en die voorreg behoort aan ons, God se gesante: “Laat die gunsgenote juig in heerlikheid … Lofverheffinge van God is in hulle keel, en ’n tweesnydende swaard in hulle hand; om wraak te oefen onder die heidene, strafgerigte onder die volke; om hulle konings met kettings te bind en hulle edeles met ysterboeie; om ’n vonnis wat opgeskrywe is, aan hulle te voltrek. ’n Eer is dit vir al sy gunsgenote! Halleluja!” (Psalm 149:5-9).

Verklaar sommer nou met vrymoedigheid dat die goddelose geeste wat verantwoordelik is vir die opstand en boosheid in die nasies van die wêreld onttroon word; hulle word afgesny en God se heerlikheid regeer oor die aarde. Neem ’n oomblik om vurig in die gees te bid en bevestig dat almal wat die bose agenda van die antichris ondersteun of aanmoedig, se dwaasheid op die lappe kom en hulle bose werke onthul en gedwarsboom word.

In hierdie eindtyd sal God se mense aanhoudend sy geregtigheid verklaar, met oorgawe meer en meer siele tot verlossing in Christus Jesus bring. Amen.

GEBED

Liewe Vader, ek neem my plek in as koning-priester om verandering te bring regoor die wêreld. Ek beëindig die bose gekonkel en maneuvers van die Satan en verklaar dat die lig van die evangelie heerlik skyn regoor die wêreld en dat baie mense wat tot dus ver op die pad van verwoesting was,   nou van die duisternis na die lig gebring word. Hulle word ook deelhebbers aan God se genade, liefde en geregtigheid, in Jesus se Naam. Amen!

VERDERE STUDIE:

Openbaring 1:6; 1 Timótheüs 2:1-3; Psalm 37:1-2 AMPC