DAGSTUKKIES UIT DIE BYBEL:
JY BESIT DIE WÊRELD

Alles waaroor die Vader beskik, behoort ook aan My; daarom dat Ek gesê het: ‘Wat Hy van My ontvang, sal Hy aan julle meedeel’ (Johannes 16:15).

Niemand het soos Jesus gepraat nie. Stel jou voor sy gewaagde woorde in die bogenoemde vers! Hy het gesê: “Alles waaroor die Vader beskik, behoort ook aan My.” Die mooi ding is dat Hy dit vir jou ook so gemaak het. Romeine 8:17 sê dat jy ’n erfgenaam van God is en mede-erfgenaam met Christus is. Halleluja!

In 1 Korintiërs 3:21 het die apostel Paulus gesê: “Moet julle dus nie daarop beroem dat julle volgelinge van een spesifieke leier is nie. Alles is immers julle s’n.” In die 22ste vers sê Hy die wêreld is joune. Hoe kan iemand dit weet en gebrek ly? Petrus het dit verstaan en verklaar: “Deurdat ons Hom regtig ken, het sy Goddelike krag ons alles laat kry wat ons nodig het om naby aan Hom te lewe. Hy het ons geroep om sy heerlikheid en goedheid te ontvang!” (2 Petrus 1:3).

As jy hierdie waarheid sou aanvaar, dit oordink en uitleef, sal jy deur niks geïntimideer word nie, hetsy omstandighede, magte, of regerings. Jy sal gróót dink, want jy weet dat die wêreld, in Christus Jesus, aan jou behoort.

Interessant genoeg, het Hy nie gesê dat die wêreld aan diegene behoort wat in die “beste” lande van die wêreld woon nie. Dink daaraan: waar is Jesus gebore? In ’n baie klein dorpie in ’n klein landjie. Maar vanuit daardie klein landjie het Hy die wêreld oorheers. Hy het vir sy dissipels gesê: “…skep moed: Ek het die wêreld reeds oorwin” (Johannes 16:33). Hy kon nie beperk word deur sy aardse geboorte of geografiese ligging nie.

Jou sukses of grootheid het niks te doen met waar jy woon, waar jy gebore is, wie jou ouers is of die werk wat jy doen nie. Dit gaan oor wie jy in Christus is. As erfgename van die Soewereine God verklaar die Woord dat alles aan jou behoort; hê hierdie bewustheid en leef elke dag in heerskappy en selfvoorsiening.

BELYDENIS

God se krag het my alles gegee wat betrekking het op die lewe en godsvrug. Ek het geen gebrek of behoefte nie. Ek is die nageslag van Abraham, daarom is die wêreld myne; alles is myne, want ek is ’n erfgenaam van God en ’n mede-erfgenaam met Christus. Geseënd is God!

VERDERE STUDIE:

1 Korinthiërs 3:21-23; 2 Petrus 1:3