DAGSTUKKIES UIT DIE BYBEL:
JESUS IS DIE AFDRUKSEL VAN GOD SE WESE

Filippus sê vir Hom: Here, toon ons die Vader, en dit is vir ons genoeg. Jesus sê vir hom: Ek is so lankal by julle, en het jy My nie geken nie, Filippus? Hy wat My gesien het, het die Vader gesien. En hoe sê jy: Toon ons die Vader? (Johannes 14:8-9).

Die Bybel sê dat die volheid van die Godheid liggaamlik in Jesus woon (Kolossense 2:9),

wat beteken dat enige iemand wat wil weet hoe God lyk, na Jesus moet kyk. Geen wonder dat Jesus vir Filippus gesê het “…Hy wat My gesien het, het die Vader gesien.” Jesus is die afdruksel van die Vader se wese.

Sommige mense glo dat daar drie trone in die hemel is: een vir die Vader, een vir die Seun, Jesus en dan nog een vir die Heilige Gees, maar dit is nie waar nie. Die Vader het Jesus met blydskap aangewys as die erfgenaam van alles, insluitend sy troon.

Dus is daar in die hemel slegs een troon en Jesus is die een wat op daardie troon sit. Waar is die Vader dan? Hy is in Jesus! Die Bybel sê dit het die Vader behaag dat in Hom (Jesus) die ganse volheid sou woon (Kolossense 1:19). Dan laat Kolossense 2:9 ons weet dat al die volheid van die Godheid liggaamlik in Hom (Jesus) woon. As jy Jesus gesien het, het jy die Vader gesien.

Geen wonder dat toe Hy in Johannes 10:30 gesê het: “Ek en die Vader is een” die Jode klippe opgetel het en Hom wou stenig nie, hoekom? Hulle het gesê dat Hy Homself gelykgestel het met God: “…oor godslastering, en omdat U wat ’n mens is, Uself God maak” (Johannes 10:33).

Die Jode het verstaan wat Jesus bedoel het toe Hy gesê het: “Ek en die Vader is een.” Maar hulle het sy woorde as godslasterlik beskou, omdat hulle nie geweet het wie Hy was nie. Jesus is die verpersoonliking van die Godheid. Wanneer jy Jesus sien, hoef jy nie te soek na die Vader en die Heilige Gees nie. Jesus is die volmaakte beeld en ikoon van die Godheid. Hy is die uitdrukking van God se heerlikheid en Hy het die uitstekendste naam in die hemel en op aarde geërf. Filippense 2:9-11 verklaar: “Daarom het God Hom ook uitermate verhoog en Hom ’n naam gegee wat bo elke naam is, sodat in die Naam van Jesus sou buig elke knie van die wat in die hemel en die wat op die aarde en die wat onder die aarde is, en elke tong sou bely dat Jesus Christus die Here is tot heerlikheid van God die Vader.” Hy is die Koning van konings en die Heer van here. Halleluja!

GEBED

Liewe Heer Jesus, al die heerlikheid, eer en majesteit kom U toe. U is die Koning van heerlikheid, die vreugde van die hemel en die helder môrester! U is die afskynsel van God se heerlikheid, die skoonheid van goddelikheid en die volmaakte afdruksel van die Vader se wese. Ek aanbid U en het U lief my kosbare verlosser, want daar is niemand soos U nie! Mag u koninkryk op aarde regeer en vir altyd in die harte van alle mense gevestig wees. Amen.

VERDERE STUDIE:

Hebreërs 1:1-3; Kolossense 2:9