DAGSTUKKIES UIT DIE BYBEL:
JESUS SELF IS GOD

Want in Hom woon al die volheid van die Godheid liggaamlik (Kolossense 2:9).

Nadat Jesus uit die dood opgestaan het, het Hy aan sy dissipels verskyn. Maar een van hulle, Tomas, was nie by nie, daarom het hy Jesus se opstanding betwyfel. Toe het Jesus by ’n ander geleentheid aan die dissipels verskyn en hierdie keer was Tomas teenwoordig en Jesus het met hom gepraat. Hy het vir Tomas gesê: “Bring jou vinger hier en kyk na my hande, en bring jou hand en steek dit in my sy; en hou op ongelowig wees, maar word gelowig!” (Johannes 20:27).

Tomas het sy hand uitgestrek en die gate in die Meester se hand en ook die sny in sy sy gevoel. In verwondering het Tomas uitgeroep: “My Here en my God!” (Johannes 20:28)! Toe Tomas vir Jesus as God aangespreek het, het Jesus nie gesê: “Nee, Tomas, moenie my God noem nie; jy gaan nou te vêr” nie. Hy het dit aanvaar, want Tomas het die waarheid gepraat. Jesus is self God.

He is die God wat in die brandende bos met Moses gepraat het. Hy is die Een wat Abraham uit Haran geroep en gesê het: “Ek is God die Almagtige. Lewe in my teenwoordigheid en wees opreg” (Genesis 17:1). Hy was die Een wat voor Josua gestaan en gesê het: “Trek uit jou sandale. Die plek waarop jy staan, is heilige grond” (Eksodus 3:5).

Jesus is God in ’n menslike liggaam, maar mense het dit nie geweet nie. Hy is Adonai, die Here, God! Hy was die Een wat vir Moses gesê het: “Ek het My aan Abraham, Isak en Jakob voorgestel as ‘God die Almagtige’. Hulle het My nie geken as ‘die Here’ nie” (Eksodus 6:3). Jehova is Jahwe. Dit is waarom die Joodse mense dit moeilik gevind het om Jesus eenvoudig te aanvaar, want dan sou hulle moes bely dat Hy Adonai is, wie Hy is. Hulle het die implikasie daarvan verstaan.

Dink daaraan: daardie skynbaar gewone man van Galilea was in der waarheid God Almagtig wat in die strate van Israel loop! Hulle kon dit nie aanvaar nie. Hulle het Hom ter dood veroordeel, maar Hy het sy lewe neergelê as die lam vir hulle verlossing. Die Bybel sê: “Maar toe Hy wel in die wêreld was – dié wêreld wat deur Hom ontstaan het – het die mensdom Hom tog nie erken nie. Hy het na sy eiendom toe gekom, en tog het sy eie mense Hom nie aanvaar nie” (Johannes 1:10-11).

Die Apostel Paulus vertel ons dat die volheid van die Godheid liggaamlik in Hom woon. Wanneer jy Jesus sien, hoef jy nie te soek na die Heilige Gees of die Vader nie, Hy is die volkome verpersoonliking van Godheid.

GEBED

Kosbare Here Jesus, U is my Here en my God! U is my lewe, die Een vir wie ek leef; U is my alles en die rede vir my bestaan. Ek aanbid U vir wie U is en dank U dat U uself vandag aan my openbaar. Amen.

VERDERE STUDIE:

Johannes 1:1-3