DAGSTUKKIES UIT DIE BYBEL:
MAAK ERNS MET GOD

Gee net vir God plek in julle lewe. Wees hartseer oor alles wat julle verkeerd gedoen het. Moenie dink julle verkeerde lewe is sommer niks nie. Dit is iets waaroor julle baie sleg moet voel. Julle behoort daaroor te huil. Vee die glimlag van selftevredenheid van julle gesig af en wys hoe jammer julle oor julle sondes is. In plaas van die lag van vrolikheid moet daar die traan van skuld en rou wees (Jakobus 4:8-9 MSG).

Efesiërs 5:15-16 is ’n goeie vermaning vir ons, veral in die eindtyd. Dit sê: “Pas dan op dat julle nougeset wandel, nie as onwyse nie, maar as wyse; en koop die tyd uit, omdat die dae boos is.”

Die prys is baie hoog. Jy kan nie jou lewe as kind van God roekeloos leef nie. Jy behoort aan Jesus Christus, so dien God met jou lewe. Leef vir Hom. Die Bybel sê: “Of weet julle nie dat julle liggaam ’n tempel is van die Heilige Gees wat in julle is, wat julle van God het, en dat julle nie aan julself behoort nie? Want julle is duur gekoop. Verheerlik God dan in julle liggaam en in julle gees wat aan God behoort” (1 Korintiërs 6:19-20). Jy behoort nie aan jouself nie; jy behoort aan Jesus Christus en Hy het ’n doel met jou lewe wat jy nog moet vervul. Dit is die belangrikste ding vir jou: vind uit wat jou doel in Hom is en vervul dit.

Die lewe gaan nie oor persoonlike drome, planne, aspirasies, of ambisies nie. Die Bybel sê: “Terwyl al hierdie dinge dan vergaan, hoedanig moet julle nie wees in heilige wandel en godsvrug nie” (2 Petrus 3:11). Dit maak nie saak watter pragtige strukture jy in die wêreld sien, of wat mense se aardse vervulling is nie; alles sal vernietig word.

Dit herinner my aan Koning Salomo wat vir God die mooiste tempel ooit gebou het. Dit was glorieryk en vanselfsprekend was God baie tevrede met hom en het hom geseën. Maar ons God leef nie in tempels wat met hande gebou is nie. Toe die Israeliete in afgodery verval het en Baäl begin dien het, is die pragtige tempel vernietig, ’n gevolg van hulle straf omdat hulle nie in ooreenstemming met sy Woord gewandel het nie.

God gee nie om oor aardse goed nie. Alles wat jy ooit op aarde kon besit kom van iets af wat reeds bestaan het en indien dit waar is, waarom lei jy nie jou lewe vir die Een wat oorspronklik alles gemaak het nie? Dien Hom met jou lewe. Raak ernstig, regtig ernstig in jou diens tot God.

GEBED

Ek is gebore tot verheerliking van God, om saam met Hom te wandel en Hom eer te bring. Hy het van die begin af beplan dat ek Hom met my lewe moet dien en waardig van Hom moet wees, om Hom in alles te verbly en vrugbaar te wees in alle goeie werke. Dit is elke dag my passie, doel en doelstelling, in Jesus se Naam. Amen.

VERDERE STUDIE:

1 Petrus 1:18-19; Efésiërs 2:10 AMPC; 1 Korinthiërs 7:23