DAGSTUKKIES UIT DIE BYBEL:
ONS IS PELGRIMS OP DIE AARDE

As julle uit die wêreld ontstaan het, sou die wêreld julle as sy eiendom liefgehad het. Omdat julle egter nie uit die wêreld ontstaan het nie, maar Ek julle uitgekies het uit die wêreld – daarom haat die wêreld julle (Johannes 15:19).

In Ester se tyd het die Jode in ’n vreemde land, ’n land van hulle ballingskap, gemaklik geraak. Hulle het vryheid geniet in die land en was gemaklik daar, totdat Haman, ’n invloedryke, maar goddelose man in die koninkryk (’n vriend van die koning) hulle probeer uitwis het.

Koning Ester was heeltemal onbewus van Haman se haat vir en plan om die Jode te vernietig. Sy het ’n aangrypende boodskap van haar oom, Mordegai, ontvang oor Haman se bose komplot. Sy het vinnig ingegryp en het regoor die land, vir al die Jode, ’n tyd om te vas en bid verklaar (Ester 4:16). Natuurlik het God hulle gebede verhoor en hulle uit die hand van die goddelose Haman verlos.

Soms kan jy so jou vryheid op aarde geniet dat jy vergeet dat jy in ’n ‘vreemde land’ is, ’n pelgrim hier op aarde. Dit het al met baie mense gebeur; hulle het meer op die reis as op die eindbestemming gefokus. Sommige Christene word deur die dinge van die wêreld weggevoer en afgelei en raak selfvoldaan. Tog het Jesus gesê: “Wat sal dit jou tog help as jy alles in die lewe bereik, maar jou diepste menswees ly skade?” (Markus 8:36).

Wees ten volle toegewy aan die Here; laat die gewigtiger sake van die Koninkryk jou inspireer tot optrede. Wen siele. Waak en bid soos Jesus gesê het om te doen. Bid vir jou volk dat die evangelie met vrye gang sal versprei en met eerbied ontvang en aangegryp sal word.

Daar is sekere lande waar die evangelie jare gelede floreer het, maar vandag laat daardie selfde nasies nie die verkondiging van die evangelie toe nie en vervolg Christene heftig. Wat het gebeur? Die antwoord is eenvoudig: die Christene in daardie lande het nie gedoen wat Jesus gesê het om te doen nie: ‘Wees waaksaam en bid …’ (Matteus 26:41).

Ons moet ons doel onthou; die rede waarom ons hier is en dit net vir ’n wyle. Ons is ambassadeurs van God wat uit die hemelse Koninkryk gestuur is om siele te red op die aarde. Daarom, soos die Bybel sê: “… streef na die dinge wat daarbo by Christus is, waar Hy aan die regterhand van God sit. Laat julle gedagtes beheer word deur die hemelse dinge, nie deur dinge op die aarde nie” (Kolossense 3:1-2).

BELYDENIS

Ek is van bo en is bewus daarvan. Regoor die wêreld word deure vir geleenthede vir bediening oopgemaak en God se kinders word toegelaat om die evangelie van Christus onverhinderd, met krag en effektiwiteit, te verkondig, in Jesus se Naam. Amen.

VERDERE STUDIE:

Handelinge 26:16; Kolossense 4:2-4; Hebreërs 11:13