DAGSTUKKIES UIT DIE BYBEL:
DRIE BELANGRIKE REDES OM SIELE TE WEN

Toe het Hy hulle beveel: “Gaan die hele wêreld in en verkondig die Goeie Nuus aan almal, oral (Markus 16:15).

Sommige mense vra of Christene wat nooit siele wen nie sal hemel toe gaan. Hulle vraag is gebaseer op wat die Here in Esegiël 33:2-6 gesê het: “… Wanneer Ek ’n leër teen ’n land stuur, kies die mense van die land iemand wat wagstaan. As hy die vyand sien aankom, maak hy alarm om die mense te waarsku. As die mense wat die alarm hoor, hulle nie daaraan steur nie, is dit hulle eie skuld as hulle doodgemaak word. Hulle het die waarskuwing gekry, maar wou nie luister nie. Hulle is verantwoordelik vir hulle eie dood. As hulle hulle aan die waarskuwing gesteur het, sou hulle hulself gered het. Maar as die wag die vyand sien aankom en nie alarm maak nie, is hy verantwoordelik as mense sterf. Hulle sal doodgemaak word oor hulle eie sondes, maar Ek hou die wag verantwoordelik.”

Daar is drie belangrike redes waarom jy as Christen die evangelie moet verkondig en siele moet wen. Eerstens, jou geloof in die Here Jesus en sy heerlike evangelie. Die tweede is jou liefde vir Hom en hoop op sy nabye wederkoms. Die derde is sy instruksie aan ons om siele te wen. Hierdie drie redes dring jou om siele te wen.

As jy nie siele wen nie, kan jou liefde vir die Here bevraagteken word. Jou hoop op die hemel word ook bevraagteken, so wel as jou gehoorsaamheid aan die Meester se instruksie. So, as jy nie ’n sielewenner is nie beteken dit jy glo nie regtig nie en die hemel is nie ’n plek vir “ongelowiges” nie, net soos dit nie vir moordenaars, afgodsdienaars ensovoorts is nie. Openbaring 21:8 sê: “Maar wat die vreesagtiges aangaan en die ongelowiges en gruwelikes en moordenaars en hoereerders en towenaars en afgodedienaars en al die leuenaars — hulle deel is in die poel wat brand met vuur en swawel: dit is die tweede dood.”

God het bepaal dat siele vir sy Koninkryk gewen moet word en Hy het ons die verantwoordelikheid gegee om die verlorenes in ons wêreld te vind en die evangelie met hulle te deel. Daarom MOET jy die verlorenes bereik en hulle na Christus bring; dis jou primêre plegtige verantwoordelikheid as kind van God. Die Apostel Paulus het dit ingesien en geskryf:

“Naamlik dat God in Christus die wêreld met Homself versoen het deur hulle hul misdade nie toe te reken nie en die woord van die versoening aan ons toe te vertrou. Ons tree dan op as gesante om Christus wil, asof God deur ons vermaan. Ons bid julle om Christus wil: Laat julle met God versoen” (2 Korintiërs 5:19- 20). Wees ten volle toegewy aan die evangelie en die verspreiding daarvan regoor die wêreld.

GEBED

Liewe Vader, dankie dat U my ’n bekwame dienaar van die Nuwe Testament gemaak het om die evangelie na die uithoeke van die aarde te neem. Ek vervul my roeping met vrymoedigheid, geloof, moed en oortuiging. Die lig van die heerlike evangelie skyn helder deur my vandag, dit bring mense uit die duisternis na die heerlike vryheid van God se kinders, in Jesus se Naam. Amen.

VERDERE STUDIE:

Romeine 1:16; Matthéüs 28:19-20; 2 Korinthiërs 3:6