DAGSTUKKIES UIT DIE BYBEL:
DIE BEWUSTHEID VAN JOU GODDELIKE WESE

Julle is uit God, my kinders, en het hulle oorwin, omdat Hy wat in julle is, groter is as hy wat in die wêreld is (1 Johannes 4:4).

Baie mense verstaan nie die taal van die Gees in die bogaande vers nie. “Julle is uit God…” beteken jy kom van God af; jy is uit Hom gebore. Dit is wat van ’n Christen ’n goddelike wese maak en nie net ’n mens nie. Halleluja!

Dit is waar sommige mense dit mis het; hulle weet nie wie hulle werklik in Christus is nie. Die Apostel Johannes het dit in 1 Johannes 5:13 aangespreek: “Dit het ek geskrywe aan julle wat glo in die Naam van die Seun van God, sodat julle kan weet dat julle die ewige lewe het….” God wil hê jy moet hierdie bewustheid, hierdie aktiewe wete, hê dat sy lewe in jou is. Jy is ’n draer van die goddelike lewe; ’n God-draer.

Met verwysing tot die Here Jesus sê die Bybel: “… Want in Hom woon al die volheid van die Godheid liggaamlik; en julle het die volheid in Hom…” (Kolossense 2:9-10). Neem kennis van die uitdrukking: “…en julle het die volheid in Hom…” Dit beteken dat die volheid van die goddelikheid in jou woon, soos in Jesus. Geen wonder Petrus noem ons “Vennote van die God-soort” nie; deelhebbers aan die goddelike natuur (2 Petrus 1:4).

Jy is vervul met of versadig deur God. Dit is wat dit beteken om jou “volheid in Hom” te hê; niks anders hoef in jou te wees om jou goddelik te maak nie. Dis waarom siektes, kwale en krankhede nie deel kan vorm van jou lewe nie. As jy die God-lewe in jou sou oordink, sal jy nooit weer siek wees nie.

Jy is gebore, nie uit bloed, of die wil van die vlees nie, ook nie uit die wil van die mens nie, maar uit God (Johannes 1:13). Dieselfde lewe wat dit vir God onmoontlik maak om siek te word, verslaan te word, of dat Hy “iets oorkom”, is wat jy in jou het. Jou bewustheid van hierdie realiteit sal jou ewig triomfantlik maak en toesien dat jy elke dag van jou lewe in heerskappy leef. Eer aan God!

BELYDENIS

Geseënd is God! Ek het die bewustheid van my goddelike wese en leef daarvolgens; ek wandel in heerskappy oor siektes, kwale, die dood en die elemente van hierdie wêreld. Christus in my is groter as alles en ek vier my eenheid met die Here vandag en altyd, in Jesus se Naam.

VERDERE STUDIE:

2 Petrus 1:4; Johannes 5:26; 1 Johannes 5:11-13