DAGSTUKKIES UIT DIE BYBEL:
DIE NUWE HEMEL EN DIE NUWE AARDE

Wat sal dit jou tog help as jy alles in die lewe bereik, maar jou diepste menswees ly skade? Jy sal met niks ter wêreld daarvoor kan vergoed nie (Markus 8:36-37).

Wanneer ’n nuwe model, of produk, of toestel geadverteer word met baie beter kenmerke, sal die waarde van die huidige een gewoonlik daal, veral as dit uitgefaseer gaan word. Gewoonlik sal almal wat belangstel in die produk begin om voor te berei vir die nuwe een en die waarde wat hulle aan die oue heg, verminder.

Dit is hoe jy die huidige wêreld moet beskou. Dit gaan verbrand en vernietig word. ’n Nuwe Hemel en aarde wat die plek van die oue gaan inneem word in die Skrif bekendgemaak. Openbaring 21:1 sê: “Toe het ek ’n nuwe hemel en ’n nuwe aarde gesien; want die eerste hemel en die eerste aarde het verbygegaan en die see het nie meer bestaan nie.” Die 4de vers sê: “Hy (God) sal elke traan van hulle oë afvee en die dood sal glad nie meer bestaan nie. Ook hartseer of smartkrete of pyn sal glad nie meer bestaan nie. Die ou dinge het verbygegaan.” Verse 18-19 sê: “Die boumateriaal van die muur is jaspis en dié van die stad self suiwer goud, so helder soos skoon glas. Die fondamentstene van die stadsmuur is met elke soort edelsteen versier….”

Die 23ste   en 25ste verse brei selfs verder uit:  “Die stad het ook nie die son en die maan nodig om dit te verlig nie, want die heerlikheid van God het dit verlig, en die Lam is sy kandelaar. Die poorte van die stad sal bedags nooit gesluit word nie en daar sal nie meer nag wees nie.” Wat ’n beskrywing! Wat ’n plek om na uit te sien!  Jou fokus moenie wees op hierdie huidige wêreld wat vernietig gaan word nie.

Onthou Jesus se woorde in ons temavers: “Wat sal dit jou tog help as jy alles in die lewe bereik, maar jou diepste menswees ly skade?” Hierdie wêreld, wat vir seker vernietig en vervang sal word met ’n ander, is nie die verlies van jou siel werd nie. So, lei jou lewe vir die Here. Laat jou passie net om die evangelie van Christus draai – dat dit regoor die wêreld versprei word – terwyl ons wag op sy heerlike wederkoms.

BELYDENIS

Ek’s dood vir die wêreld en die wêreld is dood vir my, daarom fokus ek my liefde op die Here en sy ewige Koninkryk en het ek Hom lief met my hele hart. Die dinge van die Gees is vir my van groter belang as enigiets in hierdie wêreld. Ek leef elke dag met liefde vir die evangelie. Ek verkondig en versprei dit regoor die wêreld, deur die krag van die Heilige Gees.  Amen!

VERDERE STUDIE:

2 Timótheüs 4:10; Galásiërs6:14; Kolossense 3:1-2; 2 Petrus 3:12-14