DAGSTUKKIES UIT DIE BYBEL:
DIEN DIE HERE MET JOU LEWE

Want elkeen wat sy lewe wil red, sal dit verloor; maar elkeen wat sy lewe om My ontwil verloor, hy sal dit red (Lukas 9:24).

‘n Sekere man het sy Christen seun aangeraai om nie te aktief te wees vir Jesus Christus nie. Hy was bekommerd dat die seun sy lewe kon verloor deur Jesus Christus te dien en die evangelie te verkondig. Maar die seun het geantwoord: “Pa, ek doen net wat Jesus gesê het ek moet doen, ek dien Hom met my hele lewe.”

Die man het aanstoot geneem en ysig geantwoord: “Jy doen wat Jesus gesê het jy moet doen? Dis waarom Hy jonk dood is, op drie en dertig! Hulle het Hom vermoor!” Daar is so baie mense soos daardie man wat nie Christus se doel, of die betekenis van die lewe verstaan nie. Dit gaan nie oor hoe lank jy leef nie; dit gaan oor die lewe wat jy lei.

Eintlik is die kwessie vir sulke mense nie dat hulle lank wil leef of wil hê dat hulle geliefde lank moet leef nie. In daardie geval het God hulle die ewigheid belowe, hulle eintlike probleem is vrees vir die dood. Solank vrees vir die dood ’n mens oorheers kan hy nie tot sy volle potensiaal leef nie; kan hy nie sy roeping in die lewe vervul nie. Hy sal goeters doen en sê waarin hy nie regtig glo nie, in ’n poging om sy lewe te red. Maar ons lees in ons openingsvers: “…elkeen wat sy lewe wil red, sal dit verloor…” Lei jou lewe sonder voorbehoud vir Christus! Jy moet sê: “Ek staan vir Christus en sy Koninkryk, kom wat wil! Ek verkondig die evangelie, maak nie saak wat gebeur nie!”

Onthou wat Hy in Lukas 10:19 gesê het: “Kyk, Ek gee aan julle die mag om op slange en skerpioene te trap, en oor al die krag van die vyand; en niks sal julle ooit skade doen nie.” Wees vreesloos in hierdie eindtyd terwyl jy die evangelie verkondig, want die Here self is jou verdediging. Hy sê nou vir jou dieselfde woord wat Hy vir Paulus gesê het in Handelinge 18:10: “want Ek is met jou, en niemand sal die hand aan jou slaan om jou kwaad aan te doen nie, want Ek het baie mense in hierdie stad.”

BELYDENIS

Ek leef op die lewensvlak waar die dood geen mag het nie. Ek is met Christus gekruisig, tog leef ek, maar nie ek nie, want Christus leef in my en die lewe wat ek nou in die vlees lei, leef ek deur die geloof van die Seun van God wat my lief gehad het en Homself vir my gegee het. Halleluja!

VERDERE STUDIE:

Kolossense 3:23-24; 1 Korinthiërs 15:58; Handelinge 20:24