DAGSTUKKIES UIT DIE BYBEL:
GELOOF IN SY WOORD

Toe sê Jesus vir die hoofman oor honderd: Gaan, en laat dit vir jou wees soos jy geglo het. En sy kneg het gesond geword in daardie uur (Matteus 8:13).

By geleentheid, na sy opstanding, het die Here Jesus aan sy dissipels verskyn na ’n onsuksesvolle visvangekspedisie. Die dissipels het die hele nag lank geswoeg en niks gevang nie. Toe het Jesus vir hulle gesê: “Gooi die net aan die regterkant van die skuit, en julle sal kry” (Johannes 21:6). Die Bybel sê: “…Hulle het toe gegooi en deur die menigte van visse was hulle nie meer in staat om dit te trek nie” (Johannes 21:6).

Sê nou maar hulle het met Jesus gestry! Hulle het in sy Woord geglo en dis waar die vis vandaan gekom het—uit die Woord van God. Die Bybel sê: “Deur die geloof verstaan ons dat die wêreld deur die woord van God toeberei is” (Hebreërs 11:3). Die visse is gevorm deur die Meester se Woord. Jesus het vir ons die voorbeeld gestel hoe om elke dag oorwinnend te leef, hoe om die wonderbaarlike te ervaar deur geloof in die Woord.

Dink aan die hoofman oor honderd wie se dienskneg siek was en op sterwe gelê het. Toe het hy die Joodse leiers gestuur om Jesus te smeek om sy dienskneg te genees. Die Meester het ingestem, maar die hoofman het amper onmiddellik vir Jesus laat weet: “U hoef nie na my huis toe te kom nie, sê net die woord en my kneg sal genees word” (Lukas 7:2-7). Toe Jesus die hoofman se woorde hoor, sê die Bybel dat Hy verwonder was oor sy geloof en gesê het: “selfs in Israel het Ek so ’n groot geloof nie gevind nie.” Toe die boodskappers terugkom by die hoofman se huis het hulle gesien dat die kneg volkome genees is deur Jesus se woorde (Lukas 7:9-10). Die hoofman oor honderd het geglo in Jesus se Woorde.

Wat is jou begeerte? In watter area verg jy ’n verandering of wonderwerk? Tree volgens jou geloof in God se Woord op. Die Woord van God is die antwoord op alle moeilikheid. Jy hoef nie selfdood te oorweeg omdat jy jou werk verloor het nie. Jy kan die Here vir iets beter vertrou. Hy is die God wat die dooies verlewendig. Hy kan dit wat jy dink jy verloor het en veel meer aan jou terugbesorg.

Tree volgens sy Woord op. Hy het in Johannes 14:14 gesê: “As julle iets in my Naam vra, sal Ek dit doen”; vra wat jy wil en weet dat Hy aan sy Woord verbonde is en dat dit nooit misluk nie.

GEBED

Liewe Vader, dankie vir u kosbare Woord wat geloof in my gees opwek en my bo-uitbring in elke lewenspenarie. U Woord is vermeng met geloof in my hart, daarom is my geloof lewendig en aktief en heers dit oor omstandighede en veroorsaak dat omstandighede strook met u volmaakte wil vir my, in Jesus se Naam. Amen.

VERDERE STUDIE:

Romeine 10:17; 2 Korinthiërs 4:13; Hebreërs 11:6