DAGSTUKKIES UIT DIE BYBEL:
JOU NAAM IN DIE BOEK VAN DIE LEWE

En as iemand een van die woorde van hierdie profetiese boekrol wegneem, sal God sy deel wegneem aan die boom van die lewe en aan die heilige stad waarvan in hierdie boekrol geskryf is (Openbaring 22:19).

Baie mense neem aan dat, wanneer iemand sy hart aan Christus gee, sy naam in die Boek van die Lewe geskryf word. Maar dit is nie wat die Bybel leer nie. Dit gaan nooit regtig daaroor dat jou naam in die Boek van die Lewe geskryf word nie; die probleem is wanneer iemand uit die Boek van die Lewe verwyder word.

In Eksodus 32:32 het Moses vir God gesê: “…moet U tog maar my naam uitvee uit die boek waarin U dit opgeteken het.” Moses het geweet van die Boek van die Lewe; dit is nie die boek waarin jou naam geskryf word wanneer jy wedergebore raak nie, want Moses was nie “wedergebore” nie. Wat is die Boek van die Lewe dan? Dit is die boek waarin God elkeen wat ooit in hierdie wêreld gebore is opgeteken het. Lees weer ons temavers; dit was ’n waarskuwing aan almal. God se plan was oorspronklik om elkeen van ons by Hom te hê. Die Bybel sê: “…Hy wil nie hê dat sommige verlore gaan nie, en daarom gee Hy meer tyd dat almal tot inkeer kan kom” (2 Petrus 3:9). Die ewige vuur is nooit vir mense voorberei nie (Matteus 25:41), maar vir die Duiwel en sy engele. Maar God het aan die mens die mag gegee om te kies.

Diegene wie se name eendag nie in die Boek van die Lewe gevind word nie, het net hulself om te blameer. God se antwoord aan Moses in Eksodus 32:33, wat ons vroeër gelees het, was: “…Ek sal net die name van dié wat teen My oortree het, uitvee uit die boek” (Eksodus 32:33). Wat dit bloot beteken is dat jy jou lewe vir God moet leef.

Wandel elke dag in liefde en in geregtigheid en jou naam sal in die Boek van die Lewe bly. Lei ’n lewe wat Jesus Christus verheerlik. 2 Korintiërs 5:15 sê: “Hy hét vir almal gesterf sodat dié wat lewe, nie meer vir hulself moet leef nie, maar vir Hom wat vir hulle gesterf het en opgewek is.”

GEBED

Getroue en regverdige Vader, dankie vir die voorreg om getuie te wees van u reddingskrag; ek bid vandag vir siele regoor die wêreld om u Woord te ontvang en tot bekering te kom! Ek verklaar ook dat my werke in die Koninkryk en my wandel met U, gesuiwer word deur u Gees, tot U eer, in Jesus se Naam. Amen.

VERDERE STUDIE:

Jesaja 50:7 TLB; Markus 10:29-30; Openbaring 3:5