DAGSTUKKIES UIT DIE BYBEL:
LEEF IN WAARHEID

En julle sal begryp wat die waarheid beteken, en die waarheid sal julle vrymaak (Johannes 8:32).

Ons is deur God se Woord geskape en sy Woord is waarheid; dit beteken dat ons deur die waarheid geskape is. Dit is waarom die waarheid ’n ewige uitwerking op jou gees het; dit het ’n ewige effek van sukses, oorwinning, voorspoed en gesondheid in jou lewe, want die waarheid is jou bron. Daarom vernietig valsheid, bedrog, misleiding, leuens en om te jok die menslike gees.

Om te jok stem nie ooreen met jou geaardheid nie. Sommige mense vertel leuens uit vrees vir straf, terwyl ander botweg mislei . Wat ook al jou verskoning is, leer om te alle tye die waarheid te vertel. Ons temavers sê: “en julle sal begryp wat die waarheid beteken, en die waarheid sal julle vrymaak,” want die mens is deur God geskape om vry te wees, om vry te wees om Hom te dien; hy kan nie gebind word nie, want die waarheid is sy ware natuur.

Voordat jy wedergebore is, het jy nie die vermoë gehad om die waarheid uit te leef en in die waarheid te leef nie, want jy was onder die heerskappy van die sonde. Maar nou sê die Bybel: “Die sonde mag hoegenaamd nie oor julle heerskappy voer nie…”

(Romeine 6:14). Jy het die vermoë om weg te doen met die gewoonte om leuens te vertel. Jy hoef nie te huil of selfs vir God te vra om dit weg te neem nie. Neem eenvoudig die besluit om weg te doen met leuens vertel. Die Bybel sê: “As jy die lewe wil liefhê en goeie dae wil beleef, moet jy jou tong weghou van kwaadpraat en jou lippe van leuens” (1 Petrus 3:10). Spreuke 6:16-19 sê: “Daar is ses dinge wat die Here haat, nee, eintlik sewe dinge waarvan Hy ’n afsku het: oë vol hoogmoed, ’n tong wat lieg, hande wat onskuldiges doodmaak, ’n hart wat slegte planne beraam, voete wat agter kwaad aanloop, ‘n vals getuie wat leuens verkoop, en iemand wat rusie veroorsaak tussen broers.”

Die waarheid is in jou gees. Jy kan in die waarheid leef en wanneer jy in die waarheid leef, is jy oorwinnend; jou gees gloei. Dit maak nie saak in watter situasie jy jouself bevind nie, die waarheid sal jou bo uitbring, want die waarheid is vir ewig. Eer aan God!

BELYDENIS

God se Woord lei my gedagtes, gewoontes, karakter en bou uiteindelik my lewe. Ek heers oor elke soort sonde. Ek leef in die waarheid, want die waarheid is my ware natuur. Daarom is ek oorwinnend oor elke situasie, altyd gloeiend in die gees. Eer aan God!

VERDERE STUDIE:

Efésiërs 4:25 TLB; Spreuke 12:19; Kolossense 3:9 NLT; Sagaria 8:16 GNB