DAGSTUKKIES UIT DIE BYBEL:
ONDERWERP JOU AAN SY DROOM VIR

Vertrou op die Here met alles wat jy het. Moenie staatmaak op jou eie insigte nie. Vra na die wil van God in alles wat jy doen. Hy sal die regte pad vir jou wys (Spreuke 3:5-6).

Het jy al ooit jouself afgevra: “Strook my lewe met God se volmaakte wil vir my?” Dit is om seker te wees. Jesus het gesê: “As iemand gewillig is om sy wil te doen, sal hy aangaande die leer weet of dit uit God is…” (Johannes 7:17). So, as jy gewillig is om sy wil te doen, sal Hy jou leer.

Maar soms is mense bang om God vrye teuels te gee in hul lewens. Hulle dink Hy sal hul droom wat hulle al lewenslank koester wil verander. Hulle voel Hy mag hulle dalk lei om iets te doen wat hulle nie wil doen nie. Wel, dan ken hulle Hom nie; as jy Hom nie ken nie, kan jy Hom nie vertrou nie. Maar as jy Hom ooit sou leer ken, sal jy leer om op Hom te vertrou.

Al wat Hy wil hê is wat vir jou die beste is. Hy is meer ambisieus oor jou sukses as wat jy ooit kon wees. Die dag toe ek hierdie waarheid ontdek het, het ek gesê: “Liewe Here Jesus, nou vertrou ek U met my lewe.” Ek wou vir Hom ’n sukses wees, maar Hy was meer ambisieus oor my sukses as wat ek ooit kon wees. Ek het uitgevind dat Hy liewer is vir my as vir Homself, dat Hy wyser is as wat ek ooit kon wees en ek het vrymoedig en gefokus geraak!

Onthou, Hy het die hele wêreld geskape, jou inkluis. Hy weet van alles wat binne-in jou is, Hy weet als van jou lewe. Al wat Hy wil hê is dat jy sê: “Ja, Here, ek is gereed.” Hy het ervaring daarin om met allerhande mense te werk en Hy weet presies wat om met iemand soos jy te doen.

Vertrou Hom met jou lewe. Bly te midde van sy wil en jy sal nooit verloor nie. 1 Petrus 2:6 sê: “…die wat in Hom glo, sal nooit beskaam word nie”; dit beteken dat jy nooit verneder sal word of jou sal skaam omdat jy op Hom vertrou het nie. Vertrou daarom op die Here met jou hele hart en siel en verstand en onderwerp jou aan sy droom vir jou.

GEBED

Liewe Hemelse Vader, watter troos, vertroue en blye versekering is dit nie om te weet dat ek U met my lewe kan vertrou nie; die enigste Een wat seker en getrou is. Die toekoms behoort aan U, daarom plaas ek myself in u arms wat my lei, onder die heerskappy van liefde en vertrou om tot in ewigheid deur u Woord en Gees gelei te word, terwyl ek my lotsbestemming in U vervul, in Jesus se Naam. Amen.

VERDERE STUDIE:

Handelinge 26:16-18; Psalm 18:30; Spreuke 16:3 NIV