DAGSTUKKIES UIT DIE BYBEL:
ONS IS DIE LIG…NES JESUS

Julle is die lig van die wêreld. ’n Stad wat bo-op ’n berg lê, kan nie weggesteek word nie (Matteus 5:14).

Ons lees in Johannes 8 van ’n sekere vrou wat in die daad van egbreuk betrap is en wat gestenig sou word. Maar sy het geweet waar Jesus was en haar na Hom toe gehaas. Die skare sit haar toe agterna en sê vir Jesus: “Meester, hierdie vrou is in ’n daad van egbreuk betrap; en Moses het ons in die wet bevel gegee om sulke vroue te stenig; maar U, wat sê U?” (Johannes 8:4-5). Jesus sê toe: “Wel, Ek het geen beswaar daarteen nie, maar laat die een van julle wat sonder sonde is die eerste klip gooi.”

Die Bybel sê hulle het almal hul klippe laat val en koponderstebo weggeloop. En toe, in die 12de vers, nadat Hy die vrou kalmeer het, het Hy hierdie verstommende stelling gemaak; Hy het gesê: “Ek is die lig van die wêreld; wie My volg, sal sekerlik nie in die duisternis wandel nie, maar sal die lig van die lewe hê.” Wat is die verhouding tussen hierdie stelling en wat Hy so pas vir hierdie vrou gedoen het?

As ons dit kan verstaan, kan ons ook begin om te verstaan wat Hy van ons verwag. In Johannes 9 het Hy ’n man wat sedert sy geboorte blind was ontmoet. Weereens het Jesus daardie stelling gemaak: “So lank as Ek in die wêreld is, is Ek die lig van die wêreld” (Johannes 9:5). En die volgende oomblik doen Hy toe ’n wonderwerk. Hy: “spuug op die grond en maak klei van die spuug en smeer die klei aan die oë van die blinde man” (Johannes 9:6).

Die vrou wat egbreuk gepleeg het was op die randjie van die dood en toe tree Jesus in en sê: “Ek is die lig van die wêreld.” En Hy red haar! Toe sien Hy die blinde man wat nie eens oë gehad het nie en Hy sê: “Ek IS jou lig!” Eer aan God! Jesus het vir beide gesê: “Ek is wat jul nodig het Ek moet wees. Indien jy bevryding nodig het, is Ek jou bevryding. Indien dit verlossing is, is Ek jou verlossing.  As dit genesing is, is Ek jou genesing.” Dis die betekenis van “Ek IS” Halleluja!

Nou draai Hy na ons toe en sê: “Julle is die lig van die wêreld”. Skielik is sy verwagting duidelik in ons elkeen se gees! Dit beteken dat soos jy vandag uitgaan, gaan daar vandag in iemand se lewe ’n verandering plaasvind as gevolg van jou. Indien iemand blind was kan sy oë genees as gevolg van jou! Iemand wat siek was kan genees word. ’n Verlamde persoon kan loop. Die een wat veroordeel was, kan verlos word. Jy is die lig van die wêreld, nes Jesus. Eer aan God!

BELYDENIS

Ek is die lig van die wêreld, ’n stad wat op ’n heuwel geleë is, kan nie weggesteek word nie! Daarom wandel ek in wonderwerke en glorieryke manifestasies van die bonatuurlike. Ek genees siekes, reinig die melaatses, wek dooies op en dryf duiwels uit! Soos ek vandag uitgaan, is ek die oplossing vir die probleme van vele en ook die antwoord op hul vrae; alles wat nie van God af is nie – siekte, armoede, dood, gebrek, mislukking, depressie, ensovoorts – buig voor my, in die Naam van die Here Jesus Christus! Amen.

VERDERE STUDIE:

Matthéüs 10:8; Markus 16:17-18; 1 Johannes 4:17