DAGSTUKKIES UIT DIE BYBEL:
OORDINK SY WAARHEDE

Ons almal weerspieël die heerlikheid van die Here, want die sluier is van ons gesig af weggeneem. Ons word al hoe meer verander om soos die Here te lyk, met ’n heerlikheid wat steeds toeneem namate die Here, dit is die Gees, dit aan ons gee (2 Korintiërs 3:18).

Soms kyk jy na jouself en dan lyk jy nie soos wat God sê jy moet nie. Selfs in hierdie feesseisoen, na alles wat hierdie jaar gebeur het, kan jy jou lewe in oënskou neem en wonder: “Wat is daar regtig om te vier? Die lewe was so moeilik.” As jy so dink of praat, gaan jy in die verkeerde rigting. Hou op om na omstandighede te kyk; kyk na die Woord.

Ons temavers sê, as jy die heerlikheid van God, dit is die Woord van God, in ’n spieël aanskou, word jy verander in dieselfde beeld wat jy in die Woord sien. Hoe meer jy God se Woord ondersoek (oordink), hoe meer weet jy wie jy is, sien jy wat jy het en wat jou vermoë en heerlikheid in Christus Jesus is. Lewensomstandighede is blote skaduwees; jy kyk nie na jou skaduwee om vas te stel wie jy is en hoe jy lyk nie; jy kyk in die spieël.

Die Bybel sê: “…Christus onder julle, die hoop van die heerlikheid“ (Kolossense 1:27). Dit maak geen verskil wat jou ervaring was nie; Christus is in jou. Dit beteken dat daar heerlikheid in jou lewe is! Dit is wat die spieël wys. Dit is waaroor Kersfees gaan! Kersfees beteken dat Christus sy woning in jou opgeneem het; Hy is die heerlikheid van jou lewe. Hy het vir jou gekom om in jou te woon en deur jou te leef. Halleluja!

Aanvaar hierdie waarheid! Aanvaar wat God oor jou gesê het en wie Hy jou gemaak het, oordink dit! Wees dapper en bevestig: “Noudat Christus in my woon, sal ek nooit misluk nie; Ek is vir ewig ’n oorwinnaar en ek spreek elke dag en oral die heerlikheid en geregtigheid van sy heerlike koninkryk uit.’ Halleluja

Dink gedurende die feestyd na oor God se waarheid; wie jy is en wat jou erfdeel is in Hom. Jy is ‘n sukses. Jy het welvaart, gesondheid, vrede en veiligheid. Hy het jou ‘n buitengewone lewe gegee van toenemende vooruitgang en grootsheid. Glo dit, praat en leef daarvolgens.

BELYDENIS

Christus is in my; sy lewe vloei in elke vesel van my wese, elke sel van my bloed en elke been van my liggaam! Ek is wat God sê ek is. Ek het wat Hy sê ek het en ek kan doen wat Hy sê ek kan doen. Ek rig voortdurend my blik op die Woord en elke dag word ek verander na dieselfde beeld wat ek in die Woord sien. Die Woord word volledig uitgedruk in en deur my. Ek is ’n sukses vir Jesus! Prys die Here.

VERDERE STUDIE:

2 Korinthiërs 4:18; Jona 2:8; Jesaja 26:3