DAGSTUKKIES UIT DIE BYBEL:
STEL JOU EIE GEBEDSPLAN OP

Julle sal na My roep en bid, en Ek sal na julle luister (Jeremia 29:12).

Die Here het ons geroep om te bid omdat Hy van plan is om te antwoord. Dit is wat Hy in die vers hierbo vir ons sê. Dit is dus belangrik dat jy ’n plan het vir gebed. As jy nie ’n plan het vir gebed nie, sal jy waarskynlik nie bid nie. Daar is baie aktiwiteite wat jou tyd in beslag kan neem en kan verhinder dat jy bid. Jy moet doelbewus moeite doen om ’n gebedsplan op te stel en gedissiplineerd te wees; jy kan ’n alarm stel om jou te herinner. Moet nooit te besig wees om te bid nie.

Gebed is nie iets wat jy doen, net wanneer jy iets by God wil hê nie. Gebed is daardie gemeenskap met die Here waar jy met Hom praat en aan Hom aandag gee in jou gees, om te hoor wat Hy vir jou te sê het. Elke Christen moet sulke tye hê.

As dit vir jou uitdagend is om dit gereeld te doen, kan jy die Here vra om jou te lei in die beplanning van jou persoonlike gebedskedule. Moet dit nie afskeep nie. Daar is korporatiewe gebedstye waaraan jy deelneem tydens gebedsprogramme en dienste, miskien in jou kerk of selgroep, maar dit is anders as om jou eie gebedskedule te hê.

Iemand kan sê: “Wel, ek bid een keer per week; nie elke dag nie.” Nee, dit is nie goed genoeg nie. Hou ’n gebedskedule vir elke dag, want dit help jou om elke dag ’n geestelike bewustheid hê. Jy mag dan wonder: “Hoe lank moet ek bid?”

Dit is nie vir my om te sê hoe lank jy moet bid nie, maar jy sal weet as jy nie lank genoeg gebid het nie, want dit is ’n verhouding tussen jou en die Here. As jy dink dat jy nie genoeg bid nie, voeg dan meer tyd by! Hoe meer tyd jy in der waarheid aan gebed spandeer, hoe nuttiger is dit vir jou, want afgesien van die feit dat jy met die Here praat, word jou gees opgebou terwyl jy bid.

Nie net dit nie, daar is ook die opvoeding van jou gees. Niemand voed jou op soos die Heilige Gees nie. In daardie atmosfeer van gebed leer Hy jou; Hy bring vir jou inligting wat jou verlig en lei. Eer aan God!

GEBED

Liewe Vader, ek is dankbaar vir die geleentheid om deur middel van gebed in deurlopende gemeenskap met U te wees. Ek is gedissiplineerd in gebed en selfs nou bid ek vir die redding van siele regoor die wêreld, dat hulle harte oop sal wees om die evangelie van Christus te aanvaar en gered te word. Ek bid ook vir Christene wat siek is in hul liggame, dat groot genade oor hulle uitgestort sal word vir genesing, herstel en dat ’n gevoel van welstand in hul sal opwel, in die Naam van die Here Jesus Christus. Amen.

VERDERE STUDIE:

Lukas 18:1; Judas 1:20; Efésiërs 6:18