DAGSTUKKIES UIT DIE BYBEL:
VERHEERLIK JOU LEWE

Ons weet tog: Almal sal oor hulleself verantwoording moet doen (Galasiërs 6:5).

Sommige Christene probeer God blameer vir wat eintlik hulle verantwoordelikheid is. Dikwels wanneer iets onaangenaam gebeur, besluit hulle dat dit God se wil is, anders: “Waarom het Hy dit laat gebeur?” wonder hulle. Wat sulke mense moet besef, is dat ons die mag gegee is om dinge op aarde te verander en ons lewens so mooi te maak soos wat ons wil. Jy kan jou lewe verheerlik deur God se Woord uit te leef.

In Matteus 17:20 was die Here Jesus beslis toe Hy gesê het: “…Dít verseker Ek julle, as julle geloof selfs so klein soos ’n mosterdsaadjie was, sou julle vir hierdie berg sê: ‘Skuif soontoe,’ en hy sal dit doen. Ja, niks sal vir julle onmoontlik wees nie.” Hy maak dit duidelik dat jy jou oorwinnings kan bepaal deur jou geloof in die Woord van God te plaas. Hy het jou reeds die mate van geloof gegee wat jy benodig om die veranderinge wat jy verlang, aan te bring. In Markus 9:23 het Hy gesê: “…As ’n mens glo, is álles moontlik!” Die vraag is, glo jy? As jy glo, dan lê daar voor jou ‘n lewe van eindelose moontlikhede. Laat die Woord in jou lewe werk en jy sal altyd oorwin.

Moenie “wag” dat sy Woord in jou lewe geskied nie; werk eerder “…julle eie heil uit met vrees en bewing” (Filippense 2:12 – 1953 Vertaling). Jy moet die Woord in jou lewe uitwerk en sorg dat dit resultate lewer. Deur jou geloof toe te pas, kan jy wees wat jy wil wees, verander wat jy wil verander en alles bereik wat jy wil bereik!

God het jou reeds die heerskappy en die vermoë gegee om jou lewe voorspoedig te maak. Hy het in Josua 1:8 gesê: “Hou hierdie wetboek altyd by jou. Dink dag en nag daaroor na sodat jy alles kan doen wat daarin geskryf is. Jy sal dan sukses behaal op jou pad. Jy sal voorspoedig wees.” Dit gaan oor wat jy met die Woord doen! Jy moet dit oordink en daarvolgens leef, dan sal God se heerlikheid sigbaar wees in alles wat jy doen.

BELYDENIS

My lewe is die getuienis van God se genade en ek wandel altyd in seëninge – in eindelose heerlikheid, vreugde, oorwinnings, suksesse en moontlikhede! Niks is vir my onmoontlik nie! Christus is my lewe en sy Woord werk nou en altyd kragtig in my. Halleluja!

VERDERE STUDIE:

Markus 11:23; Filippense 4:13; Josua 1:8 AMPC