DAGSTUKKIES UIT DIE BYBEL:
VERKONDIG DIT MET VRYMOEDIGHEID

Maar wanneer die Heilige Gees oor julle kom, sal julle krag ontvang en oral mense eerstehands van My vertel (Handelinge 1:8).

Jesus Christus is die Weg, die Waarheid en ie Lewe en niemand kom na die Vader toe, behalwe deur Hom nie. Wees oortuig van en gedryf deur hierdie waarheid en verkondig dit met vrymoedigheid. Moenie bang wees dat jy vervolg sal word omdat jy sy Naam verkondig nie.

2 Timoteus 3:12 sê: “Ja, en almal wat ’n toegewyde lewe in verbondenheid aan Christus Jesus wil lei, sal vervolg word.” Die vroeë apostels is geslaan en verbied om die Naam van Jesus te verkondig. Maar inplaas daarvan om hulle aan die onbetrokke godsdienstiges en owerhede te steur, het hulle Christus met nog meer vrymoedigheid verkondig en die hele Jerusalem met hul leer gevul (Handelinge 5:28).

Daar is ’n antichris-gees in die wêreld vandag wat teen die verkondiging van die evangelie werk, maar dit is nie ’n faktor nie, want ons het hom reeds oorwin. 1 Johannes 4:4 sê: “Julle is egter van God afkomstig, my kinders, en julle het hulle reeds oorwin omdat die Gees wat in julle woon, magtiger is as die gees wat in die wêreld woon.”

Volg Paulus se voorbeeld na; niks kon sy liefde vir Christus en sy passie vir die evangelie belemmer nie. In Handelinge 20:22-24 het hy gesê: “En nou is ek op pad Jerusalem toe, gebind deur die Gees. Wat dáár met my gaan gebeur, weet ek nie. Wat ek wel weet, is dat die Heilige Gees my in elke stad verseker dat gevangenskap en vervolging voorlê. Al is my lewe kosbaar, ag ek dit van geen waarde as ek nie my lewenstaak en my bediening wat ek van die Here Jesus gekry het, kan klaarmaak nie: Om die Goeie Nuus te verkondig dat God mense liefhet sonder dat hulle iets hoef te doen om dit te verdien.”

Behou dieselfde oortuiging! Hierdie glorieryke evangelie wat aan jou toevertrou is, is alles werd. Verkondig dit oral met vrymoedigheid.

GEBED

Dierbare Vader, dankie dat u Woord in my hart is soos ’n brandende vuur in my bene. Ek vervul my roeping as draer van goddelike waarhede in my wêreld en staan vas in die geloof, onverskrokke versprei ek u geregtigheid regoor die hele wêreld, in Jesus se Naam. Amen.

VERDERE STUDIE:

Spreuke 31:8-9 NET; Matthéüs 10:32-35