AS HY NIE HEER IS OOR ALLES NIE, IS HY GLAD NIE HEER NIE
IF HE ISN’T LORD OF ALL, HE ISN’T LORD AT ALL

Goeie Nuus vandag met Pastoor Chris uit die Rhapsody of Realities.

Julle weet tog dat God aan die volk Israel die Goeie Nuus gestuur het dat daar vrede met Hom is deur Jesus Christus, wat Here oor almal is (Handelinge 10:36).

‘N Sekere man het pas sy lewe aan Christus gegee, maar is steeds deur die Duiwel geteister. Hy het by God gekla: “Ek het gedog met U in my huis sal ek nie meer probleme hê nie!” Die Here het hom geantwoord deur hom daarop te wys dat hy slegs een kamer in sy hele huis aan Hom gegee het. In sy geval was God net in daardie een kamer wanneer die Duiwel die huis binnegekom, met die man baklei en hom gewond het.

Die man het toe daaroor nagedink en gesê: “Reg so Here, ek gee U drie ekstra kamers.” Daardie nag het die Duiwel weer gekom en hom weer gepla. Hierdie keer was die man kwaad vir God. Hy het woedend gevra: “Ek het U nou vier kamers gegee en U het steeds die Duiwel toegelaat om in te kom. Wat moet ek nóg doen?” Die Here het hom vriendelik geantwoord: “Die huis is nie myne nie; jy het my vier kamers in jou huis gegee en die Duiwel kan nie by enige van daardie kamers ingaan nie.”

Uiteindelik het die man die boodskap gekry en gesê: “Reg so, Here. Ek gee die hele huis oor aan U; dit is nou alles U s’n.” Die volgende aand het die Duiwel weer opgedaag, maar daar was ’n nuwe eienaar. God was by die hek en die Duiwel kon nie inkom nie. Dit is wat gebeur wanneer alles in jou lewe aan Jesus behoort.

Christenskap is nie ’n terloopse aanvaarding van Jesus Christus as jou Verlosser nie; Hy wil Heer (meester of baas) van jou lewe wees, nie net wettiglik nie. As Hy nie Heer is van jou lewe en alles aangaande jou nie, dan is Hy glad nie jou Heer nie! Hy het in Lukas 9:23 gesê: “As julle my volgelinge wil wees, moet julle julle eie-ek prysgee, elke dag julle kruis opneem en My volg.” Vandag word hierdie verklaring meestal geïnterpreteer as verdraagsaamheid in vervolging, bespotting, teistering en kritiek wat die wêreld na ons kant toe gooi, maar in Jesus se tyd het die uitdrukking: “‘n kruis opneem” beteken om te sterf deur middel van kruisiging. Uit Jesus se daaropvolgende stelling is dit duidelik dat dit wel is wat Hy geïmpliseer het: “As julle probeer om julle lewe vir julleself te bewaar, sal julle dit verloor. Maar as julle julle lewe ter wille van My prysgee, sal julle dit juis bewaar” (Lukas 9:24). 

Ware toegewyde Christenskap is nie ’n ligsinnige, terloopse verhouding nie, maar ’n radikale verbintenis tot Christus en sy doel. Jy moet Hom alles gee en ten volle en opreg vir Hom lewe. Halleluja!

BELYDENIS

Ek bely met vrymoedigheid dat Jesus die Heer is van my lewe. Hy is die Heer oor my finansies, familie, beroep en alles wat my aanbetref. Hy is my alles en my lewe is tot sy verheerliking, nou en vir altyd. Amen.

VERDERE STUDIE:

Lukas 9:23-24; Matthéüs 6:24; 1 Johannes 2:15-17