BETER AS SIEKTES EN KWALE
SUPERIOR TO SICKNESS AND DISEASE

Goeie Nuus vandag met Pastoor Chris uit die Rhapsody of Realities.

Hierdie is die wondertekens wat dié sal beleef wat glo: Hulle sal duiwels in my Naam uitdryf, en hulle sal in nuwe tale praat. Hulle sal slange ongedeerd kan hanteer en as hulle iets giftigs drink, sal dit hulle nie affekteer nie. Hulle sal siekes die hande oplê, en hulle sal gesond word (Markus 16:17-18).

Bogenoemde Skrif  is  buitengewoon;  dit openbaar iets treffend oor jou, die Christen, die nuwe skepping: jy is beter as siektes, kwale en swakhede. Jy het ’n lewe wat nie deur enige vorm van siekte besmet kan word nie. Jy kan nie vergiftig of vernietig word nie.Dit maak nie saak dat daar vir jou gesê is dat ’n sekere gif, of ’n virus, jou stelsel binnegekom het nie; dit sal geen mag oor jou hê nie. In Lukas 10:19 sê Jesus: “En Ek het julle gesag gegee oor alle mag van die vyand, en julle kan oor slange en skerpioene loop en hulle vermorsel. Niks sal julle beseer nie.” Dit is of waar of nie waar nie, maar goddank dit is waar!

Leef met die bewustheid dat jy deel het aan die goddelike natuur. Moet jou nie by die massas skaar wat deur die verspreiding van aansteeklike siektes verbouereer en ontsenu word nie; die lewe in jou is goddelik; dit word nie deur bloed onderhou nie, maar deur die Gees van God wat in jou woon: “Omdat die Gees van die God wat Jesus uit die dood opgewek het in julle woon, sal Hy wat Christus uit die dood opgewek het, ook julle dooie liggame weer lewendig maak  deur  dieselfde  Gees  wat  in  julle  woon” (Romeine 8:11).

Die voorafgaande vers is nie ’n belofte nie, maar ’n lewensbelangrike werklikheid noudat die Heilige Gees in jou woon: Hy is die lewe van jou tasbare liggaam. Miskien is jy dalk met ’n ongeneeslike siekte gediagnoseer, verklaar die Woord totdat die goddelike lewe in jou die oorhand kry. Hou aan om met geloof in jou hart te bevestig: “Dieselfde Gees wat Jesus uit die dood opgewek het, woon in my en het my fisiese liggaam versterk. Ek het die lewe van God in my; daardie lewe vernietig siektes en kwale. Ek wandel in goddelike gesondheid. Ek weier om siek te wees!”

Christene is mense wat uit die dood opgestaan het. Hulle is ’n ander spesie. Daarom sê die Bybel: “Maar julle is ’n uitverkore geslag…” (1 Petrus 2:9). Die woord ‘geslag’ is dieselfde woord wat gebruik word vir ‘spesie’. Jy is ’n spesiale spesie, beter as die duiwel, siektes, gebreke en alles wat van die duiwel af is.

Neem vanuit die geesteswêreld beheer van jou lewe en onderwerp jou wêreld en jou omgewing daaraan. Verklaar sommer nou dat jy, deur die Woord en die Gees, oorwinnend leef, bo siektes, kwale en die dood. Halleluja!

GEBED

Ek wandel in oorwinning en heerskappy oor die Satan, die wêreld en sy stelsels. Dankie Vader vir u goddelike lewe in my en die krag van u Woord en die Heilige Gees. Ek leef seëvierend bo siektes, kwale en gebreke, in Jesus se Naam. Amen.

VERDERE STUDIE:

2 Petrus 1:4; Romeine 8:10-11